Hi kamu semua, si Maurina ani inda pandai mengupdate blog nya. Walaupun kan jadi chigu. Nda apa lah, kepada orang-orang yang ada withdrawal symptoms atu, menggigil, paloh sajuk, angat2 dingin, don’t worry, aku saja mengupdatekan.

Apa bisai kan diceritakan. Ahhh awu, baru-baru ani ada ku mendangar rumah kecurian di kampung kami ani. Bari bauri, jangan-jangan si Khairul Bin Dagang lagi telapas lokap. Nauzubillah eh. Atu banar, macam David Copperfield. Balik balik malar telapas.

Apa cerita nya ni tadi, ah awu, orang rumah kecurian. Kesian eh, usin nya kan BND$5 000 kana curi. Yang sedihnya lagi, usin atu kan dipakaikan nya umrah. Maklum lah karang ani kan ada sudah “Pakej Musim Sajuk” (Alhamdullilah). Bukan macam dulu, mun umrah pun payah. Yatah, banyak jua tu lima ribu atu, mun di tukar ke riyal, dalam 10 000 ada jua kali eh. Mun pakai makan kabab di Makah, kabungkayangan jua tu.

Rawan ati ku mendangar. Bukan apa, ingat ku dalam 3 tahun yang lalu, the exact same thing pernah happen arah ku. Ganya aku masa atu kan naik haji. Imajin saja, flight ku atu tangahari, pencuri atu datang the night before: dalam pukul 3 pagi.

Cani ceritanya: usin ku atu ku taruh arah drawer siring katil. Barutah pernah ku menyimpan usin tu di sana atu, orang rumah sorang pun jua inda tau yang aku menaruh sana. Inda ku tau lah cana pencuri atu tau sana ada usin, perasahan ku nada jua ku menaruh label “DI SINI ADA DUIT”. 

So as usual lah, kitani urang Brunei, mun ada function, kenduri kenduri ani, banyak lah jua saudara-mara sleepover, temasuk tah jua Nini. Nini atu banarnya kan tidur di living room, kali ngam tia jua panuh, yatah ku offer tah ya tidur di bilikku. Lagipun masa atu arah bilikku ada anu sofa bed atu. Ok jua tu kan. Mula mula nda ya mau, ku pajal-pajal, inda jua ya kan besampit sampitan di living room kan. Akhirnya mengalah ya. So ku sediakan.

Masa malam atu, becerita-cerita tah kami ni sebelum tidur atu. Cerita cerita kosong lah. Pasal pengalaman Nini masa kedia naik haji, share share doa. Biasalah orang tua suka reminisce. Ku tanya ya mau selimut lagi manatau ya sajuk. Inda nya. Sian ku jua Nini atu. Bisai bah, walautah usia nya atu sudah lanjut, mampu ya lagi kan sleepover kalau ada function rasa kan mendangani atu. Rasa jua kan bejumpa-jumpa saudara mara atu ah. Anyway, syiok syiok mendangar ceritanya ahirnya tetidur.

Skalinya tangah2 malam, tebangun tia ku ulih bunyi mcm screeching. Ku cari lah dari mana. Inda pulang ku begarak. Kira palau lah maseh tu ah, bangun-bangun tidur nya urang. Ampir bunyinya, dan macam familiar. Aku atu mikirkan, pernah ku dangar bunyi ani. Kali nampak tah ku ada urang masuk dari tabuk!!!!

Rupanya bunyi screeching atu bunyi tabuk jendela kana buka!!!! Inda ku tau kenapa jendela ku inda bekunci masa atu, padahal inda ku pernah membuka selama ani. Sajuk ni badan ku, adrenaline rush kali, bepikir kan behapa, ingaukan Nini, Nini atu lagi sakit jantung. Pencuri atu pikir aku maseh tidur pulang, pasal aku nda begarak. Tapi muka pencuri atu clear maseh di ingatan ku. Iyatah antara muka paling ku ingat tu muanya ah.

Eksen ku bedaham. Beranti ya begarak. Then liatnya ku laying still atu, sambungnya “mission” nya. Tau ya menulus kan drawer atu.  Tau ya wah menulus envelope mana satu yang ada usin. Then sudah di ambilnya envelope, dipalingnya badannya kan menuju ke jendela, duduk ku, ku kajuti ya “HOI!”.

Apa lagi, tarus ya belusir ke jendela sepantas kilat, ku bubut!!!! Dui bajunya ganya ku sampat mengganggam. Kuat eh pencuri ah. Nini ani pun tebangun ni menerais, gigiran. Riuh! Pas atu laju2 ku belusir keluar rumah kan membubut (I know a shortcut). Nampak ku maseh belakangnya. Ngam masa atu, cousin2 ku atu maseh bangun tu lepak2 di living room. Liat durang aku atu belusir keluar, durang ikuti, then barutah keluar suaraku, ku teraisi ni PENCURI PENCURI!!!

Tapi laju bah pencuri atu. Aku lagi inda beselipar, jalanraya anu pisin batu alus. Tapi yang pentingnya duit ku atu hilang. H. I. L. A. N. G. Hilang ani wah. Baru jua ku withdraw kemarin. MARAH jua tu ulihnya. Then sedih ku atu bukan main. Bah bukan nya apa, yatah ganya usin pakai ku kan dakat sebulan di Saudi Arabia bah tu. Inda pulang banyak banar, but ada jua lah. Sudah bebalik ke rumah, aku atu kan menelipun pulis, rupanya ada sudah kana telipunkan.

Ku check Nini, sama Babu ya masa atu. Ok ya, ganya tekajut lah. Kabak2 ya nya. Needless to say the whole house tebangun lapas atu. Datang pulis, membuat statement, etcetera, ku explain lah apa terjadi, mua pencuri atu, semua lah ku bagitau. Nini pun kana tanya. After semua selasai, ada tah ni Nini ani menyaman kan ati lah tu ah.

Cakapnya, “Jangan tah kau ingau kan tu duit mu yang ilang atu, Allah membari rezeki atu, Allah jua yang mengambil balik.”

Ku awu awu saja lah ah, kira pasrah lah, sambungnya lagi, “Andangnya naik haji ani banyak cubaan, kau alum lagi belayar pun sudah kau diuji. Terima saja. Redhakan. Ada  tah tu hikmahnya. Mun inda kau nampak di dunia, insya Allah, di akhirat kau merasai”

Ku terima tah apa nya Nini atu. Kira inda apa lah, usin saja, baik jua inda ya mengapa2kan orang kan. Baik duit dari nyawa. Ku bawa saja tidur. Maybe pasal ngalih (membubut pencuri kali ah), telalap jua mata.

Esuk paginya I felt okay. Sedih pun inda, marah pun inda. Excited lah, maklum lah kan naik haji. Ku check lah hand luggage ku, manatau ada naindah lupa dibawa. Then, keluar ku kan mandi apa, kana unjuki envelope. Rupanya masa ku di bilik atu bisdurang cousin cousin ku, uncle, aunty apa ani membuat derma kilat. Eeeh kan nangis saja ku inda. Bari rawan ati!

Now, 3 years later, Alhamdullilah, I can say that I completed my ibadah Haji even without all that money I had initially planned on bringing. Besyukur lah ku, dapat jua hidup dengan duit sedakah atu. Tapi maseh jua ku pikir-pikirkan cakap Nini masa atu: “ada hikmahnya ni”.

I really agree now, yang segalanya ada hikmah. Baik jua duit atu kana ambil masa ku maseh di Brunei. Mun belayar sudah, inda ku tau cemana kan survive.

Masa di sana tah, barutah ku pernah merasai hidup macam seorang yang seakan2 daif. Andang kali Allah atu kan menunjukkan yang di luar atu banyak lagi urang yang indada berkemampuan kalah aku. Meaningful bah puasa ku atu. Banyak kali ah disana atu orang hidup merempat rasa jua kan naik haji atu. Aku at least, tinggal di hotel lagi, bukan di kaki lima. Dapat merasai katil yang nyaman and suasana yang bersih. Barutah ku paham. Sadar bah ulihnya.

Banar pulang payah kan shopping apa ah. Tapinya ku pikir-pikirkan lagi, aku disana bukan nya kan shopping, aku di sana kerana Allah. So, that was one hikmah, aku sembahyang apa khusyuk, inda ingaukan kadai tutup takut nda sampat membali bali. Bukan pulang kan mengucapkan urang yang kuat shopping masa di sana ah. Maybe diurang lain lagi ujian durang. Wallahualam. 

Mun ku ingat-ingat lagi jua pasal malam atu, pelik bah. Cemana pencuri atu tau envelope mana satu kan ditulusi. Padahal drawer atu bejurit bah dengan envelope. Duit yang ku withdraw tangahari atu ganya di ambilnya, duit sedakah urang di envelope lain dipigangnya pun inda. Kuasa Allah. Mungkin duit ku withdraw (duit bonus tah jua) atu bukan rezeki ku yang halal.

Aku dulu atu, mun keraja selaluuuuu ahir datang. Inda cukup ahir datang, baliknya lagi awal. Manakan rezeki nda halal. Ahirnya alum ku merasai kan memakai, kana tarik ulih Allah. Tapi aku redha lah. It’s ok. I survived. Nowadays I learnt my lesson, inda ku lagi awal balik, ahir datang. Takut ku gaji ku ujung bulan atu inda halal lagi, then ku bagi makan anak bini. Nya urang we are what we eat. Mun halal yang tani makan, halal lah darah daging tani. Vice versa. Inda ku sanggup mun darah daging ku atau darah daging anak bini ku atu dari yang inda halal. Nauzubillah.

Lagi, every dollar I spent there was duit yang kana sedakahi. How humbling can anything get? It really opened up my eyes. Baik jua ada family yang caring and inda camah mata. Masa ku balik pun kana sambut dengan meriah. Masa atu nda salah ku, Tsunami jua tu. Ingat ku meliat CNN dari hotel. Nah imagine lah those who naik haji, and had nothing to come back to. At least I had a home, a family.

Ahhh panjang tu ceritaku. Andangnya urang tua tua ani, mun didulur inda beranti. Bah ok ok, kan abis tah ni. So what’s the moral here? Entah lah ah, I’m not really sure jua where I’m going with this. Just that, yang rumahnya kecurian $5 000 atu, I hope ya ada Nini yang dapat bagitau iya walaupun kejadian nya pahit, hikmahnya gerenti ada. Inda nampak awalani, nanti tani teliat. Insya Allah.

Tangah Laki