From Tangah Laki: “Anglah lai… bilarai kau lagi??”

Hi y’all, look who’s back! Tangah Laki finally comes in to berdudun after so long! He says his legs hurt, but I don’t believe him because I saw him last week rounding up his buffaloes, looking rather healthy and radiant!

I’m gonna leave you all with him while I pack, I’ve asked him to tell you a story. 😀 Have fun!

Awu belarai tia lagi anak kamanakan ku ani. Orang kaya bah indada keraja lain. Kawan nya abis sudah kekaraja, kedia lalai lalai kan menanam anggur. Tumbuh alum jua tau tumbuh! Sariatu belarai nya ke mana kah, melawat TEMPLE. Illallah kadiaku kan mambawa UMRAH inda ya tekabir. Buat melawat temple tia pulang daulu! Andangnya kanak kanak jaman masa ani. Luan luan mandulur ati. Ani, alum panas duduk di rumah, belarai tia lagi! Ke Langkawi. Pakai Airasia. Eh, atu inda ku kompidan tu. Bisdurang Hajah Kandis, pupu ku dari Pakilong Muara, parnah, ke KL mambali kain, naik Airasia anak cucu nya membawa. Iyatah nya Hajah Kandis, BAGAGAR bah kapal atu BAGAGAR! Yatah ku uri tu lai, ijap ku banar banar. Umur ani lagi jua pindik, malas ku mamindikkan lagi. Taubat ani alum jua tau kana tarima kah inda.

Tangah ani daulu, urangnya samsing bah. Nini mu atu luan mandulur. Nah salah salah jua luan kan memanjakan anak atu, misti jua ada keseimbangan bah. Bisai bisai kana antat skulah eskep. Kana bawa basigup, mau tah jua basigup. Daulu mana tau kan bahaya apa. Indada tu di skulah, ani sudah badan tua barutah kan sadar. Sampai parnah jadi kelayi bah sama Tangahmu Bini pasal basigup ani! Ani baik jua maseh mesra. I love u darling!

Masa daulu atu ada kadiaku, si Ali, sama si Amit tu. Kami tiga ani innnnnnda bulih becarai. Segalanya kan sama sama. Membali nasi lamak ah, bebagi tiga tu, ayamnya panggal adil. Sampai ani ah, mun Tangah mengingati, rawan ati.

Pernah kami tiga ani, masa musim perayaan di bandar, balimpang di tangah tangah Padang Umar Ali Saipudin, bacarita sambil bekurik gigi. Andangnya kanak kanak ani banyak angan angan bah ah. Nya si Amit nya, eh nanti aku belisin, aku masuk asgar ku. Si Ali nya, eh payah saja belisin, mun nada matuka? Draip tah kau basikal ke Binturan. Hahaha. Banyak cita cita kami atu dulu, kawin lah, keraja lah, apa lah. Umur kami inda salah palingkungan 15 tahun tu, hangat hangat kan belisin, kecuali si Amit, iya paling tua, 17 tahun.

Tapi Tuhan tah maha kuasa. Cita cita kami mungkin satu atau dua saja yang tercapai. Tahun dapannya si Amit belisin. Mula ya belisin banyak ya tah kawan baru, Tangah pun jarang tah lagi kan bejumpa kedia. Si Ali pun sibuk jua baru tah pernah kan begalpren. Tinggal tah Tangah ani.

Entah cemana, tiba tiba kami inda lagi serapat dulu. Si Amit sudah jadi samsing kampung, kaki pukul. Mun namanya badannya bebigi bigi siapa inda galat nah. Ijap urang kan mengampiri. Eh pamos hantap. Kalau ada apa apa, garinti kedia kana lagau tu tukang antam. Angan angan nya dulu kan masuk asgar memang tecapai, tapi malangnya kana buang pasal tatatertib. Ku dangar kadapatan positive urine test. Atu yang ku dangar lah, Wallahuallam inda kitani tau banar kah inda. Tapi sayang bah padahal muda lakat. Even kitani karang ani mun kana buang keraja atu, galap tah tu masa dapan. So iya di rumah saja, inda membuat apa apa. Usin apa mamanya membari. Kesian, padahal si Amit atu tah ganya anak diurang.

Cematu tah ganya ya, hidupnya yang inda tantu arah. Kali suatu hari, Nini mu menalipun masa Tangah bekeraja. Katanya kawan mu si Amit meninggal. Lai, walaupun kami inda lagi rapat, Tuhan saja yang tau perasaan ku masa atu, macam kehilangan ahli keluarga. Rupanya iya meninggal lapas kana antam oleh samsing di Limbang. Inda ku tau apa sebanarnya ceritanya lah, tapi yang ku dangar, iya pernah mengantam adik lelaki atu, dan ani kononnya ya membalas dendam lah.

Akhirnya apa yang dibuatnya arah keluarga orang lain terjadi arah keluarganya. Tuhan maha membalas. Ia meninggal atu ya Allah, di dalam pub. Indungnya yang sudah tua tepaksa belajau mengambil mayatnya dari Limbang. Subahanallah, tabah nya inda ku tebayang. Tapi, semoga rohnya dicucuri rahmat. Selalu Tangah sedakahi iya AlFatihah, semoga siksa nya kurang. Sampat kah inda bertaubat? Inda kitani tau.

Kadang kadang lai, tani nda tau kenapa pekara cemani berlaku. Tapi tani memang kan besoal. Mungkin kalau ku rapat dengannya maseh dulu, iya nda akan jadi cematu. Mungkin ada anaknya jua 6 orang macam Tangah. 🙂 Atau mungkin aku pun boleh jadi cematu. Nauzubillah. Tapi aku inda akan mensia siakan kematiannya. Tangah jadikan pengajaran. Bila ku dangar cerita kanak kanak sibuk kan bekelayi tah pulang kerajanya. Bukan budaya kitani tu, biartia orang bebuat jahat arah kitani jangan tani bebuat jahat arah orang.

Kisah si Amit malar Tangah ingatkan terutama bila meliat orang muda yang hidupnya terbuang. Tangah ani banyak sudah meliat orang kononnya menunjuk nunjuk yang kedia atu samseng. Nada guna guna bah tu. Buang masa. Hidup cematu hidup yang rugi. Masa muda inda terasa, sudah kamu tua, kamu tepikir kenapa masa ku muda inda ku bebuat baik? Kenapa ku inda menuntut ilmu? Kenapa ku inda buat ani? Kenapa ku inda buat atu? Sudah tua atu sadar tia, hidup ani inda dapat di rewind. Jangan biarkan masa tuamu bagai sesalan. Sengsara hidup cematu atu.

Mendangar kau tu lai? Bisai bisai membawa diri di negara orang atu. Ingat cerita si Amit. Buat baik berpada pada, buat jahat jangan sekali. Pakai kacuping. Mun beranang jangan luan asik tapi enjoy yourself ok. Tangah Bini mu suka tu di sana. Bawakan tah kami ani olih olih.

Advertisements

6 Comments

  1. maw, siuk eh crita tangah lakimu ani. tekanangku masa ku muda-muda dulu. main bula pun bulih bekelaei, pantang tesagir. samapai ada yang patah kaki ku bintih. pernah jua jadi road rage, ku bubut (pakai kerita plang) sampai ke rumah dreber gila baei ah, ku ayunkan belantan baik jua inda kana muanya. sori eh, panjang plang komen ku. kirim salam tangah lakimu ah. peumuran kediaku kali jua.

    Like

    Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s